ಕವನ : 'ನದಿ ನಡೆದ ಹಾದಿ... '

 ಈ ಭಾನುವಾರದ (ಮೇ04,2025) ಸಂಯುಕ್ತ ಕರ್ನಾಟಕ ಪತ್ರಿಕೆಯಲ್ಲಿ ಪ್ರಕಟವಾದ ನನ್ನ ಕವನ

'ನದಿ ನಡೆದ ಹಾದಿ... ' ನಿಮ್ಮ ಪ್ರೀತಿಯ 

ಓದಿಗೆ🌼

'ಸಂಯುಕ್ತ ಕರ್ನಾಟಕ' ಪತ್ರಿಕಾ ಬಳಗಕ್ಕೆ ಧನ್ಯವಾದಗಳು🙏

🌾ನದಿ ನಡೆದ ಹಾದಿ...🥀

ಅಂದು

ಆ ಕುತೂಹಲಭರಿತ ಎಳವೆಯಲಿ

ಕಂಡಾಗಲೆಲ್ಲಾ

 ಹರಿವ  ನದಿಯ 

 ಕಾಡುತ್ತಿದ್ದುದೊಂದೇ ಪ್ರಶ್ನೆ 

ಹೇಗಾಗಿರಬಹುದು ಇದರ ಹುಟ್ಟು

ಮುಟ್ಟುವುದಾದರೂ ಇದೆಲ್ಲಿಗೆ?

ಒಂದೊಮ್ಮೆ

ಈ ಅಗಾಧ ಜಲರಾಶಿಯ 

 ದಡಗುಂಟ ನಡೆ ನಡೆದು  

ಹಿಮ್ಮುಖವಾಗಿ 

ತಲುಪಲೇ ಬೇಕೆಂಬಾಸೆ

ಉಗಮ ಸ್ಥಾನವ 

ನೋಡಬಾರದಂತೆ

ನದಿ ಮೂಲ ಋಷಿ ಮೂಲ

ಕಡೆಗಣಿಸಲಾಗುವುದೇ

ಬೆಳೆದ ಬೃಹತ್ ಆಲದ

ಕಣ ಸದೃಶ ಬೀಜವ 

'ನ್ಯಗ್ರೋಧ ಬೀಜಂ ಕೆಲಂ

ಸಿಡಿದುಂ ಪೆರ್ಮರವಾಗದೇ'

ಅದೋ ಅಲ್ಲೊಂದು 

ಪರ್ವತದ ಕೊರಕಲಿನಿಂದಿಳಿವ 

ಕಂಡೂ ಕಾಣದಂಥಾ

ಕಿರಿದಾದ ಜಲಧಾರೆ 

ಇಳಿದಿಳಿದು ಝರಿಯಾಗಿ ತೊರೆಯಾಗಿ

ಹಳ್ಳ, ಝರಿಗಳು ಸೇರಿ 

ಹೊಳೆಯಾಗಿ,

ಹರಿದಂತೆ ಹೆಬ್ಬಾಗಿ

ಬೆಟ್ಟ ಕೊಳ್ಳಗಳಲ್ಲಿ 

ಬೊಬ್ಬಿರಿದು ಧುಮ್ಮಿಕ್ಕಿ 

ಜಲಪಾತ ಸೃಷ್ಟಿಸಿ

ಭೋರ್ಗರೆದು ಬಂಡೆದ್ದು

ದಣಿವಾಯ್ತೆ?

ಬಯಲಲಿ ಬಿಡುಬೀಸಾಗಿ 

ಹರಡಿ ಹದ ಮೀರದೇ

ಭವ್ಯ ಗಾಂಭೀರ್ಯದ ಹರಿವಾಗಿ… 

ಮತ್ತಿದೇ ನದಿಗುಂಟ

ಪರಿಕ್ರಮಿಸಿ ಮುನ್ನಡೆದು

ಸುಳಿಗಳ ನಿರ್ಮಿಸುವ

ಸುತ್ತಿ ದ್ವೀಪವಾಗಿಸುವ

ಪರಿಕಂಡು ಬೆರಗಾಗಿ

ಪರಮಾದ್ಭುತಕೆ ಶಿರಬಾಗಿ

ಸಾಗಿ ಸಾಗಿ 

ಸೇರುವವರೆಗೂ 

ಸಾಗರದೊಳೊಂದಾಗಿ...

ಎಲ್ಲಿಯ ಆದಿ? ಮತ್ತೆಲ್ಲಿ ಅಂತ್ಯ?

ಹುಟ್ಟು-ಸಾವೆನ್ನುವುದು

ಈ ನೆಲಕಷ್ಟೆ ಸೀಮಿತವೆ

ಇಲ್ಲಿ ಮೂರ್ತತೆಯ ಮುಕ್ತಾಯ

ಮತ್ತೆಲ್ಲೋ ತೆರೆದ ಅಧ್ಯಾಯ

                               ~ಪ್ರಭಾಮಣಿ ನಾಗರಾಜ