ಅ೦ತಃಶಕ್ತಿ

ಮತ್ತೆ ಚಿಗುರುತಿದೆ ಪಪ್ಪಾಯ
ಈಗ ರಕ್ಷಣೆ ಅತ್ಯಗತ್ಯ smile emoticon

ಹಗ್ಗ

ಹೊಸೆಯುತ್ತಿದ್ದಾನೆ ಈತ ಹಗ್ಗವ

ಹೊಸೆದ ಭಾಗವ ಕಾಲಿನಿಂದ ಮೆಟ್ಟಿ
ಆಗಾಗ ಪರೀಕ್ಷಿಸುತ್ತಾ ಗಟ್ಟಿತನವ

ಉಡಿಯುತ್ತಲೇ ಮಧ್ಯೆ ಮಧ್ಯೆ
ಸೇರಿಸುವ ಸೆಣಬು
ಎಂದೋ ಕತ್ತಾಳೆ ಕೊಳೆಯಿಸಿ
ಸಿದ್ಧಗೊಳಿಸಿದ ಕಸುಬು

ಅಲ್ಲಲ್ಲಿ ತೆಂಗಿನ ಜುಂಗು
ಈಗೀಗ ಸಂಶ್ಲೇಶಿತ ನಾರು
ಎಂದೂ ಮುಗಿಯದ
ಕಾರುಬಾರು

ಆದಿಯಿಲ್ಲದ ಈ ಹಗ್ಗ
ಚಾಚುತಿದೆ ಅನಂತಕೆ
ಜೀಗುವುದಷ್ಟೇ
ಕಸುಬುಗಾರಿಕೆ!

ಅಂದು
ತೂಗುತೊಟ್ಟಿಲಾಗಿದ್ದು
ಜೀವಜಂತುಗಳಿಗೆ
ಉರುಲೂ ಆಗಿದೆ ಇಂದು
ಅಪರಾಧಿ ನಿರಪರಾಧಿಗಳಿಗೆಲ್ಲಾ

ಆಕಾಶಕ್ಕೇರಿಸುವ
ನೂಲು ಏಣಿ
ಪ್ರಪಾತದತ್ತ
ಹಾರಲೂ ಅಣಿ!

ಸುತ್ತ ಸೆಳೆಯುತಿದೆ
ಎಲ್ಲರನೂ ತನ್ನತ್ತ
ಅಲ್ಲಲ್ಲೆ ನಿರ್ಮಿತ
ದಾಟಲಾರದ ವೃತ್ತ

ಸ್ಪೋಟಗೊಳ್ಳುತಲೇ ಇದೆ
ಅತೃಪ್ತಿ
ಹಗ್ಗಕಿದರ ಎಗ್ಗೇ ಇಲ್ಲ
ಉದ್ದುದ್ದ ಬೆಳೆಯುತ್ತಲೇ ಇದೆ
`ಕೊಳೆ’ಯನೇ ಮೆತ್ತಿಕೊಳ್ಳುತ್ತಾ...
ಆಸ್ವಾದಿಸುತ್ತಾ...

ಪಾಪ ಪಪ್ಪಾಯ!

ಅಡಚಣೆ ಮೀರಿ ಮುನ್ನುಗ್ಗಿ ಬೆಳೆಯುತ್ತಿದ್ದ ಕವಲು ಪಪ್ಪಾಯಕ್ಕೆ ಮತ್ತೊಂದು ಮಹಾಸಂಕಟ :( ಹಾಗಿದ್ದ ಪಪ್ಪಾಯ ಹೀಗಾಯ್ತು frown emoticon ಏನೂ ಅರಿಯದ ಮುಗ್ಧ ಮೇಯುತ್ತಾ ಮುಂದೆ ಸಾಗುತ್ತಿದೆ!

ಬಿಗಿದುಕೊಂಡಿದ್ದೇವೆ ನಮ್ಮನ್ನೇ.....

ತಾಸುಗಳಲ್ಲೇ ನಿಮಿಷಗಳು
ಸೆಕೆಂಡ್ಸ್
ಮೈಕ್ರೊ, ನ್ಯಾನೊ 
ಏನೇನೋ
ವ್ಯವಧಾನವಿಲ್ಲ
ಸೂಕ್ಷ್ಮಾತಿ ಸೂಕ್ಷ್ಮ
ಕಾಲ ಗಣನೆಗೆ

ಉರುಳುತ್ತಿವೆ
ಗಂಟೆಗಳೇ
ಹಗಲು ರಾತ್ರಿಗಳ
ನಿರಂತರ
ಜೂಟಾಟದಲ್ಲಿ...

ಚಲಿಸುತ್ತಿರುವುದು
ಗಡಿಯಾರದ
ಮುಳ್ಳುಗಳೋ
ಗಡಿಬಿಡಿಯ
ಮರುಳೋ?

`ಟಿಕ್ ಟಿಕ್ ಗೆಳೆಯನೆ
ಟಿಕ್ ಟಿಕ್ ಟಿಕ್...’ಗೆ
ಹೆಜ್ಜೆಹಾಕಿ
ಕುಣಿಯುತ್ತಿದ್ದ
ಕಾಲುಗಳಿಗೀಗ
ಪುರುಸೊತ್ತಿಲ್ಲ
ನಿಲ್ಲಲೂ!

ಕಾಲುಗಳೇ ಗಡಿಯಾರದ
ಮುಳ್ಳುಗಳಾಗಿ
ಸಾಗಿದೆ
ಕಾಲನ ಓಟ
ಜೈವಿಕ ಗಡಿಯಾರಕ್ಕೂ
ಪ್ರಾಣ ಸಂಕಟ!

ಇರುಳನೇ ಬೆಳಗಾಗಿಸಿ
ದುಡಿವ
ಕೈಗಳಿಗೀಗ
ಅಜ್ಞಾತ ತಲೆಯ
ನಿರ್ದೇಶನ

ಹೌದು
ಕಟ್ಟಿಕೊಂಡಿಲ್ಲ ನಾವು
ಗಡಿಯಾರವ
ಬಿಗಿದುಕೊಂಡಿದ್ದೇವೆ
ನಮ್ಮನ್ನೇ
ಗಡಿಯಾರಕ್ಕೆ!

(image- web)

ಅ೦ತಃಸತ್ವ!

ಅ೦ತಃಸತ್ವ!

೧. ಕಿರುತೋಟದ ಪಪ್ಪಾಯ!
೨. ಬೀದಿಯ ಬದಿಯಲಿ ತಾನಾಗೇ ಬೆಳೆದು ಪಲ್ಲೈಸುತ್ತಿರುವ ಪಪ್ಪಾಯ!
೩. ಬೇಡದ ಸಸ್ಯಗಳ ನಡುವೆ ಬೆಳೆದದ್ದನ್ನು ಕತ್ತರಿಸಿ ಎಸೆದಿದ್ದರೂ ಪುನಃ ಕವಲೊಡೆದು ಚಿಗುರಿ ನಳನಳಸುತ್ತಿರುವ ಪಪ್ಪಾಯ!

ಮನದ ಅಂಗಳದಿ.....

ಬೆಳೆ ಇಲ್ಲದ ಜಾಗದಲ್ಲಿ 

ಬೆಳೆವುದು ಕಳೆ

ಯಥೇಚ್ಚ


ಪೈರನ್ನೇ ಹಿಮ್ಮೆಟ್ಟಿಸಿ
ಹುಲುಸಾಗುವಲ್ಲೇ
ವಿಕಟಾಟ್ಟಹಾಸ


ಉಳಿವಿಗಾಗಿ
ಪೈಪೋಟಿಯಲ್ಲಿ
ಸಮರ್ಥ ಕಳೆಗೇ
ಉಳಿವು


ಕಳೆಯ ನಿರ್ಮೂಲನೆಗೋ
ಹತ್ತೆಂಟು ಹಾದಿ
ಕಿತ್ತಷ್ಟೂ
ಮತ್ತೆ ಚಿಗುರುವ
ರಕ್ತ ಬೀಜಾಸುರನ ವಂಶ
ಬೆಳೆಗೇಕಿಲ್ಲ
ಆ ಒಂದೂ
ಅಂಶ?


ಬೆಳೆಯನೇ
ಬಳಸುವ
ಧೃತರಾಷ್ಟ್ರಾಲಿಂಗನ
ಎತ್ತಲಿಂದಲೋ
ಬಂದವತರಿಸಿದ
ಪಾಥೇನಿಯಂ
ಪಯಣ!


ಕಳೆಯ ನಾಶದತ್ತಲೇ
ಕೇಂದ್ರೀಕೃತ ಮನವ
ಬೆಳೆಯ
ಸದೃಢಗೊಳಿಸುವತ್ತ
ಕೊಂಡೊಯ್ದರೆ ಹೇಗೆ?


ಸಮರ್ಥ ಬೆಳೆ
ನಿಂತೀತು
ಕಳೆಯನೇ ಮೆಟ್ಟಿ
ಗೊಬ್ಬರವಾಗಿಸಿಕೊಳ್ಳುತ್ತಾ.....

ಆಸ್ವಾದಿಸುತ್ತಾ..........

`ಹನಿ'-ಆಕಾಂಕ್ಷೆ

ಬಿದ್ದರೂ ಚಿಂತಿಲ್ಲ

ಉಳಿಗಳ ಹೊಡೆತ

ಅವಿರತ

‘ಕಲೆ’ಯಾಗಬಲ್ಲೆ,

ಆಗದಿರಲಿ ಸ್ಪೋಟ

ಅನಿರೀಕ್ಷಿತ

‘ಛಿದ್ರ’ವಾಗಲೊಲ್ಲೆ!