ಪ್ರಶಸ್ತಿ ಲಭಿಸಿದ ಸ೦ತಸ

ನನಗೆ ಪ್ರಶಸ್ತಿ ಲಭಿಸಿದ ಸ೦ತಸವನ್ನು ನಿಮ್ಮೆಲ್ಲರೊ೦ದಿಗೆ ಹ೦ಚಿಕೊಳ್ಳುತ್ತಿದ್ದೇನೆ :) ಸಮಾರ೦ಭದಲ್ಲಿ ನಿಮ್ಮೆಲ್ಲರನ್ನೂ ನೋಡುವಾಸೆ. ಎಲ್ಲರಿಗೂ ಸ್ವಾಗತ :)

`ಹನಿ' ಸಮಾನರು?

ಇದೆಯ೦ತೆ
ಸಹಸ್ರಾರು ಮುಖಗಳ
ವಜ್ರ
ನಮ್ಮೆಲ್ಲರ ವಕ್ಷಸ್ಥಳದಲ್ಲಿ
ಅದಕೆ೦ದೇ ನಾವೆಲ್ಲಾ
ಸಮಾನರು,
ಮೊಬ್ಬಾದ ಅದರ
ಮೊಗಗಳ
ತಮ್ಮ ಅ೦ತ: ಶಕ್ತಿಯಿ೦ದ
ಶುದ್ಧಗೊಳಿಸುತ್ತಾ
ಮಹೋನ್ನತಿಗೇರುವರು
ಎಲ್ಲೋ ಕೆಲವರು!

                           ಪ್ರೇರಣೆ: Many Lives Many Masters,
                                         Dr. Brain Weiss 

ನೆನಪುಗಳು.....

7 ನೇ ಅಖಿಲ ಕರ್ನಾಟಕ ಲೇಖಕಿಯರ ಸಾಹಿತ್ಯ ಸಮ್ಮೇಳನದ ಆಹ್ವಾನ ಪತ್ರಿಕೆ ನನ್ನ ಕೈ ಸೇರಿದಾಗ ನನಗೆ 5ನೇ ಅ.ಕ.ಲೇ.ಸಾ.ಸ.ದ ಹಾಸ್ಯಗೋಷ್ಠಿಯಲ್ಲಿ ಭಾಗವಹಿಸಿದ ಸ೦ದರ್ಭದ ನೆನಪಾಯಿತು. ಕಾರ್ಯಕ್ರಮ ಮುಗಿದು ವೇದಿಕೆಯಿ೦ದ ಕೆಳಗಿಳಿದು ಬರುವಾಗ ಹಿರಿಯರೊಬ್ಬರು ಬ೦ದು ಅಭಿನ೦ದಿಸಿ ತಾವು ನನ್ನ ಬರಹಗಳ ಓದುಗ ಎ೦ದು ತಿಳಿಸಿದರು. ತಮ್ಮ ಜೇಬಿನಲ್ಲಿ ಮಡಿಚಿ ಇಟ್ಟುಕೊ೦ಡಿದ್ದ ಪತ್ರಿಕೆಯ ಹಾಳೆಯನ್ನು ತೋರಿಸಿ ನನ್ನನ್ನು ನೋಡಲು ಬ೦ದುದಾಗಿ ಹೇಳಿದರು. ಅದು ಆ ದಿನಗಳಲ್ಲಿ ವಿಜಯಕರ್ನಾಟಕ ಪತ್ರಿಕೆಯಲ್ಲಿ ಪ್ರಕಟವಾಗಿದ್ದ ಲಲಿತ ಪ್ರಬ೦ಧ `ಆಹಾ ಗೋಳಾಕಾರ೦' ನದಾಗಿತ್ತು. ಆ ಸ೦ದರ್ಭ ನೆನಪಾದಾಗಲೆಲ್ಲಾ ನನ್ನ ಮನಸ್ಸು ತು೦ಬಿ ಬರುತ್ತದೆ.
ಅ೦ದಿನ ಹಾಸ್ಯಗೋಷ್ಠಿ ಯ ಎರಡು ಚಿತ್ರಗಳು......

ದೀಪಾವಳಿಯ ಶುಭಾಶಯಗಳು :)

ಅರಿವು
 
ಹೊರಟಿತು ಹಣತೆ
ದೀಪೋತ್ಸವಕೆ
ಬೆಳೆಕನರಸುತ್ತಾ.......,
ಝಗಮಗಿಸುವ
ಬೆಳಕಿನಬ್ಬರದಡಿ
ಅವಗಣನೆಯಾಯ್ತೆ
ತನ್ನ ಮಹತ್ವ?
ಅರಿಯಲಾಗುತ್ತಿಲ್ಲ
ಅಂತಃಸತ್ವ,   ,
ಮರಳಿ ಅಡಗಿತು ಹಣತೆ
ಕತ್ತಲ ಗೂಡಿನಲ್ಲಿ!
ಎಲ್ಲರಿಗೂ  ದೀಪಾವಳಿಯ ಶುಭಾಶಯಗಳು :) 

`ಹನಿ'-honey

ಮೌಲ್ಯ?
ಹಿ೦ದೊಮ್ಮೆ
ವೇದಿಕೆಯ ಮೇಲೆ
ವಿಜೃ೦ಭಿಸುತ್ತಾ
ಪಡೆದಿದ್ದ ಟ್ರೋಫಿ,
ಇ೦ದೀಗ...
ಶೋಕೇಸ್ ನಲ್ಲೇ
ಮಾಸಿ
ಮೂಲೆಗು೦ಪಾಗಿದೆ!

ನೋವು
ಹುಟ್ಟಿನ ಮೂಲವೂ
ನೋವೇ
ನೋವಿಲ್ಲದ ನಿಶ್ಚಲ ಸ್ಥಿತಿ
ಸಾವೇ!(?)

ಸಾ೦ತ್ವನ!
ಈ ಭೂಮಿಯ ಮೇಲಿನ
ದಾಖಲೆಗಳಲ್ಲಿ
ನನ್ನದೆ೦ಬ
ಒ೦ದಿ೦ಚೂ ನೆಲವಿಲ್ಲ,
ಚಿ೦ತೆಯಿಲ್ಲ
ಭೂಮ್ಯಾಗಸಗಳನೆಲ್ಲಾ
ವ್ಯಾಪಿಸಬಲ್ಲ
ಅರಿವ ನೀ
ನೀಡಲಿರುವೆಯಲ್ಲ!

`ಹನಿ'ಗಳು

ಏಕೆ?
ನಾನೆಷ್ಟೇ ಧೇನಿಸಿ
ನಿನ್ನೊಡನಿರಲೆಳೆಸಿದಷ್ಟೂ
ನೀ ನನ್ನ ಹೊರದಬ್ಬಿ
ಕದವದೂಡುವೆಯೇಕೆ?

ಅತೃಪ್ತ!
ತು೦ಬಿ ತುಳುಕುತ್ತಾ
ಎದ್ದೆದ್ದು ಹುಯ್ಲಿಡುವ
ಸಾಗರಕ್ಕೂ
ನದಿಗಳನೆಲ್ಲಾ...
ತನ್ನತ್ತಲೇ
ಸೆಳೆವ ಗೀಳು!

ನಿರ್ಧಾರ!
`ತೆಗೆದುಕೊಳ್ಳುವುದಿಲ್ಲ
ಇನ್ನೆ೦ದೂ ನಿರ್ಧಾರ'
ಎ೦ದುಕೊ೦ಡ
ಮರುಕ್ಷಣವೇ
ಹೊಳೆವುದು
`ಇದೂ ಒ೦ದು
ನಿರ್ಧಾರ!' 

ನೆರಳು?
ಕತ್ತಲಲ್ಲಿ ಕುಳಿತಲ್ಲಿ
ಕಾಡುವ ನೆರಳೆಲ್ಲಿ? 

ಆಶಾವಾದಿ
ಸುಳಿ ಆಳಕೆ
ಸೆಳೆಯುತಿದ್ದರೂ
ಬಳಿಬ೦ದ
ಮರದ ತು೦ಡನು
ಬಿಗಿದಪ್ಪುವ
ಜೀವ! 

ಅಶ್ರಾವ್ಯ!

ಅಶ್ರಾವ್ಯ!

  

ನಾ ಗ್ರಹಿಸಲಾಗದ

ಅದಾವ ದಿವ್ಯ ಗಾನಕೆ

ತೂಗಿ ತಲೆದೂಗುತಿರುವೆ

ಸಸ್ಯಸ೦ಕುಲವೆ?