ಹನಿ - `ಅದ್ವೈತ'

ಅದ್ವೈತ

ಬಿಟ್ಟುಬಿಡುವೆಯೇಕೆ

ಕಿತ್ತೋಡುವಂತೆ?

ಸೂತ್ರಹರಿದು

ಲಾಗಹೊಡೆದು

ಮತ್ತೆಲ್ಲೋ ಸಿಲುಕಿ

ಪಟಪಟಿಸಿ

ಪರ್ರೆನುವ ಮೊದಲೇ

ಸೆಳೆದುಕೊ ನಿನ್ನ ತೆಕ್ಕೆಗೆ

ವಿಹರಿಸುವುದೇನಿದ್ದರೂ

ನಿನ್ನೊಟ್ಟಿಗೇ.

`ಹನಿ' - ಸಫಲತೆ

ಸಫಲತೆ

ಎಲೆಮರೆಯ ಕಾಯಂತೆ

ತೆರೆಯ ಹಿಂದೇ ಬಲಿತು

ಫಲಿಸಲೆನ್ನೀ ಜೀವ

ಸಾರ್ಥಕ್ಯದಲ್ಲಿ

`ಹನಿ' - ಆಟ!

ಆಟ!

ನೀನಿಲ್ಲಿ

ಪಾದವೂರಿದಾಗಷ್ಟೇ

ನಿನ್ನ ಒಡನಾಟ,

ಅತ್ತಿತ್ತ ಹೆಜ್ಜೆ

ಸರಿಸಿದಾಕ್ಷಣವೇ

ಪತ್ತೆ ಇಲ್ಲದ ಓಟ!

ಇದೆಂಥಾ ವಿಚಿತ್ರ ಆಟ!

ಹನಿ - ‘ಲೀನ’

‘ಲೀನ’

‘ನಾನು’

ಎಂಬುದ ಮೀರಿ

ನಾ

ನಿನ್ನೊಳಗೊಂದಾಗಬೇಕು,

ಸಿಂಧುವಿನಲಿ ಬಿಂದು

ಲೀನವಾಗುವಂತೆ!

ಹನಿ - `ನಾನರಿಯೆ'

ನಾನರಿಯೆ

ಅಲ್ಪ ಅಲ್ಪ ಕೋರಿಕೆಗಳಲೇ

ಈ ಬದುಕ ತುಂಬುತ್ತಿರುವೆಯಲ್ಲಾ...

ಎಂಬ ನಿನ್ನ ಎಚ್ಚರಿಕೆಯೇನೋ ಸರಿಯೇ

ಆದರೂ...

ಅಡಿಗಡಿಗೂ ನಿನ್ನ

ಒಡನಾಟವಿಲ್ಲದೇ

ಮುಂದಡಿಯಿಡುವುದು ಹೇಗೋ

ನಾನರಿಯೆ!

ಹನಿ - ಅರಿವು

ಅರಿತುಕೊಂಡೆ
ನನ್ನೊಳಗಿನೊಳಗಿಗೆ ಮಾತ್ರ
ನಿನ್ನೊಡನಾಡಲು
ಸಾಧ್ಯ,
ಬಾಹ್ಯ ಅಲ್ಪಾಪೇಕ್ಷೆಗಳೆಲ್ಲಾ
ವೈರುಧ್ಯ!