ದ್ವಂದ್ವ

ಆಕೆ ಬೆಳಕಿನಂತೆ

ಒಮ್ಮೊಮ್ಮೆ ಕಣರೂಪಿ

ಮತ್ತೊಮ್ಮೆ

ಬಳುಕು ಅಲೆ

                          

 ಇದ್ದಲ್ಲೇ ನೇರ ಪಥ

ಮಧ್ಯವರ್ತಿ

ಬದಲಾಯಿಸಿದಾಗ ಮಾತ್ರ

ವಕ್ರನಡೆ

ರಾಚಿದ ಮೇಲ್ಮೈಯ

ಬಣ್ಣವನ್ನೇ ಬಯಲು

ಮಾಡಲೂ ಇಲ್ಲ ಬಿಡೆ!

ತಲೆಮಾರಿನಿಂದ ಬಂದ

ಮಡಿ ಮೈಲಿಗೆ

ವ್ರತ ನೇಮ

ಸ್ವಂತಿಕೆಯ ಹೋಮ

ಹಿರಿಯರಿಗೆ

ತಗ್ಗಿಬಗ್ಗಿ

ನವಪೀಳಿಗೆಯ

ನಾಸ್ತಿಕತೆಗೂ ಒಗ್ಗಿ

ಸಾಗುವ

ಪೀಳಿಗೆಯಂತರದ ಸೇತು

ಏಕೆ

ದ್ವಂದ್ವ ಸ್ವಭಾವ

ಎನುವ ಮಾತು?

ಕೋರಿಕೆ

ನಾ ರಜನಿ
ನೀ ಉಷೆ,
ಬೆಳಕಿನ ಕಿರಣ
ಹಿಡಿದು ತಾರಾ...
ಓ ಭಗಿನಿ
ಇದು ನಿಶೆ,
ಕತ್ತಲನು
ಹರಿಸು ಬಾರಾ...

(ನನಗೆ ನೆನಪಿರುವ೦ತೆ ಇದು ನನ್ನ ಮೊದಲ ಹನಿಗವನ!)

ಈ ಸ೦ತಸ.......

ನಮ್ಮ ಮಗಳು ಸುಷ್ಮ ಸಿಂಧು ( Sushma Sindhu ) , ಎಂ. ಎಸ್ಸಿ.(ಕ್ಲಿನಿಕಲ್ ಸೈಕಾಲಜಿ) ನಾಲ್ಕನೇ ಸೆಮ್ ನಲ್ಲಿಯೂ ಟಾಪರ್ ಆಗಿದ್ದಾಳೆ. ಇವತ್ತು ಬೆಳಿಗ್ಗೆ ರಿಸಲ್ಟ್ ಬ೦ತು. ಮೊದಲ ಮೂರೂ ಸೆಮ್ ಗಳಲ್ಲಿಯೂ ಟಾಪರ್ ಆಗಿದ್ದು ಈ ಸ೦ತಸವನ್ನು ನಿಮ್ಮೆಲ್ಲರೊಡನೆ ಹ೦ಚಿಕೊಳ್ಳುತ್ತಿದ್ದೇನೆ.

ಸಮೃದ್ದಿ

ನೀರಿಲ್ಲದೇ ನಲುಗಿ                              

ನೊ೦ದ ಗಿಡಗಳ                                

ಕ೦ಡು ಮರುಗಿ                               

ಹ೦ಬಲಿಸಿದೆ ಮಳೆಗಾಗಿ                           

ಸುರಿಯುತಿದೆ ಬಿಡದ ಜಡಿ ಮಳೆ               

ಗಿಡ ಕಾಣದ೦ತೆ ಬೆಳೆದಿದೆ ಕಳೆ!                    

ಆಸ್ಫೋಟ

ತೆರೆದಿತ್ತು ಮೇಲ್ಮೈ

ಅವಕಾಶಕ್ಕ೦ದು

ನಿರ೦ತರ ಆವೀಕರಣ

ನಿರಾಳ

ಸಾ೦ತ್ವನ

ಮುಚ್ಚಿದ ಧಾರಕದಲ್ಲೀಗ

ಮಿತಿ ಮೀರಿದ

ಬಾಹ್ಯದೊತ್ತಾಯ

ಹಬೆಯ ಹೊರ 

ನೂಕಲೂ ಆಗದೇ

ಇ೦ಗಲೂ ಬಿಡದೇ

ಆ೦ತರ್ಯದಲೇ

ಕುದ್ದು ಕುದ್ದು...

ಅಧಿಕವಾದ

ಅ೦ತರ೦ಗದೊತ್ತಡ

ಕ್ಷಣಗಣನೆಯಾಗುತಿದೆ

ಆಸ್ಫೋಟಕೆ!